اخر الاخبار

الاثنين، 15 أبريل 2019

تجهيزات رمضان 2019

ايام ويدخل علينا الشهر الكريم، شهر رمضان شهر الصوم والعبادة، اجمل الشهور في السنة، ومع اقترابه يركز الكثير على تحضير اللوازم لموائد السحور والفطار حيث تقوم سيدات البيوت بتفريز الخضار للاكلات والفواكه لصنع اشهى العصائر مقدما لكي لا تتعب وقت الصيام وتستطيع ان تخصص وقتا للعبادة.
لهذا قررنا في هذه المدونة تقديم افكار وتجهيزات يمكن ان تقدم بعض المساعدة وتسهل الموضوع على سيدات البيوت
الافكار متعددة حسب مقدرة كل انسان.
نتمنى ان ينال الموضوع اعجابكم.


استخدمي الاكياس بطريقة ذكية وهى طريقة تبطيط  الحاجة لتسهيل عملية السحب والفك و اعادتها بسهولة بعد اخذ الكمية اللازمة، وترتب الاكياس عمودياا او افقيا في المجمد.







يمكن ايضا تعويض الاكياس بعلب بلاستيكية اذا كان لديك مجمدا كبيرا لان العلب تاخد مساحة اكبر من الاكياس 




يمكن تجهيز البرجر وتتبيله وحفظه في المجمد كما يمكن تجهيز اصابع الكفتة.


فراخ متبلة و بطاطس نص سوا جاهزة من مجاميعه


كما يمكن وضع العديد من الخضار في المجمد بهذه الطريقة 


الملوخية


يوضع الفلفل اما مقطعا او كاملا



جزر مبشور



تحضير وتخزين السلق للقلقاس


يمكن تجهيز السمبوسك او الجلاش او البوراك بحشواته المختلفة ووضعه في علب ثوم وضعه في المجمد






يمكن تحضير الفواكه لاستخدامها في سلطة الفواكه او العصائر 





كما نقدم لك افكارا ثانية نتمنى ان تكون ذات فائدة لك

تسبيكة الخضار
الاول نشوف حنعمل طبخة كم مرة ، نفترض اننا حنعمل طبخة اسبوعيا يعنى احنا محتاجين اربع تسبيكات .. هنجيب حوالى 2 كيلو طماطم مقشرة ونضربهم فى الخلاط،  وفى حلة نشوح اربع بصلات كبار فى زيت وسمنة، ثم نضيف الطماطم ونتبلها بملح وفلفل اسود وبابريكا ولاوري وزعتر ونسيبها تتسبك ..

نرفعها من على النار نسيبها تبرد بعدها نقسمها لاربعة اكياس كبيرة  شوية عشان نبططها ومتاخدش مساحة فى الفريزر وده طبعا بالنسبة لكل حاجة بنحفظها


تسبيكة المحشى
ودى باعملها بحوالى كيلو بصل او اكثر شوية يتشوح فى الزيت لغاية ما لونه يشف واضيف له برطمان صلصة مذوبة فى الماء " من الصلصة اللى احنا عملناها والطماطم رخيصة " او برطمان صلصة جاهزة ومعاها طماطمايتين ثلاثة مبشورة عشان تديها طعم الطماطم الفريش ونتبل بملح وفلفل ولما تتسبك نضيف 3 حزم كبيرة مقطعة صغيرا جدا بالعيدان من كل من البقدونس والكسبرة والشبت يعنى المجموع 9 حزم وتقليبتين ونطفى عليها ونسيبها تبرد وتتقسم فى اكياس حسب الكمية اللى انت متعودة تعمليها
عند استخدامها يضاف للخلطة بصلة متوسطة مبشورة نية وملعقة صغيرة نعناع بودر ولو محشى كرنب نزود ملعقة كمون وتقلب ويضاف الرز



تسبيكة المكرونة
جهزى تسبيكة المكرونة وضيفى لها ملح وفلفل وجنزبيل وبودرة بصل وقسميها فى اكياس صغيرة وجمعيهم فى كيس واحد لتمييزهم



تسبيكة الفتة
لو ناوية تعملى فتة فى رمضان جهزى الصوص بتاعها بالخل والتوم وشيليه فى برطمان على رف التلاجة لو تلاجتك كويسة او فى الفريزر ... شوحى التوم المفروم فى السمن واطفيه بالخل ثم ضيفى عصير الطماطم وتبلى بملح وفلفل وسبكيها وطبعا الكمية حسب عدد المرات وكل مرة فى برطمان صغير

الشوربة
_
شوربة اللحم والفراخ يراعى تخزينها فى اكياس صغيرة لنجيد استخدامها دون هدر بحيث يكون متاح لك استخدام كيس واحد او مضاعفة الكمية حسب الحاجة

_
نوعى فى الشوربة ... فى اكياس صغيرة احفظى بنجر وبسلة وكوسة وقرع عسلى وكرنب اخضر واحمر وبروكلى كل نوع على حدى لعمل شوربات مختلفة



العصاج
_
وده بنحتاجه لوصفات كتييييير جدا وعشان نزود كميته نضيف بصل كتير وجزر مبشور وكوسة مبشورة ... يعنى كيلو المفروم ياخد حوالى ربع كيلو من كل من البصل والجزر والكوسة
وكده ممكن تقسميه على خمس اكياس
_
لو عايزة توفرى اكثر استبدلى عصاج اللحمة بعصاج الفراخ المفرومة واعمليه بنفس الطريقة



تحابيش
_
هنعمل خلطة حشو من عصاج الحمة ببصل كتير ومضاف لها فلفل رومى مكعبات وزيتون اسود او اخضر مفروم ونعمل ايه بقى نجيب لفة او اتنين جلاش ونعمل اصابع محشية بالخلطة دى ونرصها فى طبق فوم وبين كل طبقة والتانية كيس نايلون
_
بصدر فرخة مقطع مكعبات صغيرة متشوحة مع بصل وفلفل الوان او اخضر فقط نعمل حشوة للكانيلونى وبرضه نحفظه فى طبقات بينها كيس نايلون فى طبق فوم
_
بلفة جلاش نقطعها زى السمبوسك عشان تبقى اوفر نعمل سمبوسك بالجبنة القريش والزعتر او الكمون حسب الرغبة وممكن بالخضارالمشكل .. او بالسبانخ المتشوحة بالتوم ونحط كل نوع لوحده فىى طبق وبعد ما يتجمد نرصه فى كيس ونستغنى عن كل الاطباق ما عدا واحد فقط تحت لحفظ القوام مع توفير مساحة فى الفريزر
_
ممكن تعملى عجينة الكريب و تحتفظى بالأقراص هى اللى تجمديها و لما تسيح تبقى إحشيها عادى خالص بس خلى بالك بين واحدة والتانية كيس نايلون




المحمصات
_
كيلو شعرية او المقدار اللى متعودة تستعمليه فى الشهر وحمصيه على النار او في الفرن بدون دهون وبرديه واحفظيه فى بطرمان زجاجى فى دولاب المطبخ وهيبقى عندك جاهز للرز والشوربة
_
كيلو لسان عصفور حمصيه واحفظيه بنفس الطريقة السابقة ينفع للطواجن وللشوربة
_
جمعى بواقى العيش البلدى وقصيها مكعبات بالمقص وحمريها فى الزيت او حمصيها فى الفرن واحتفظى بها فى برطمان زجاجى فى دولاب المطبخ ليوم تعملى فتة متخافيش مش هيجرى لها حاجة

_
بنفس الطريقة جهزى العيش الشامى لفتة الشاورمة
_
لو بتحبى المكرونة المحمرة برضه حمصيها وجهزيها بنفس الطريقة
_
حمصى العيش الفينو واطحنيه لعمل بقسماط وبهريه بالبهارات اللى بتحبيها

 

 

البانية
_
شرائح فراخ بانيه جاهزة على التحمير يعنى مبطنة ببيض وبقسماط .. او زبادى وبقسماط حسب المتوفر 
_
بفتيك جاهز على التحمير كالسابق 




اللحوم
_
لو هنطبخ بلحوم فممكن نسلق كمية اللى هنستعملها طول الشهر ونقسمها فى اكياس تكفى الطبخة وطبعا نحتفظ بالشوربة سواء فى اكياس منفردة او بكيس اللحم على قد الطبخة 
_
اعملى عرق تريبيانكو لحمة باردة "روزبيف" وقسميه فى اكياس على قد الوجبة بينفع فى وقت زنقة يبقى جاهز مع شوية مكرونة وسلاطة 




الكفتة
هنجهز اطباق من الكفتة البانية جاهزة بالبيض والبقسماط على التحمير
كفتة الفراخ جاهزة على التحمير 
كفتة رز سواء بلحمة او نباتى متصبعة ومتحمرة 
كفتة بطاطس جاهزة على التحمير
كفتة عدس جاهزة للتحمير او الفرن
كفتة داوود باشا نباتى متشكلة كور ومتحمرة 



الأسماك.

في أغلب الأحيان يفضل أن يتم شراء الأسماك طازجة ولكن يمكنك أن تقومي بشراء كمية تكفي لوجبة أو وجبتين من السمك المقلي ويتم تقسيمها في كيسين، يتم تنظيف الأسماك جيداً وعمل خلطة الثوم والفلفل الأخضر والليمون وحشو الأسماك ثم وضعها في الفريزر وتخرج قبل التحمير بساعة، توضع في الدقيق ثم تقلى في الزيت فقط.
يمكنك أيضاً دهن صينية بالزيت ثم وضع الأسماك في الصينية وإدخالها الفرن مع القليل من الأرز المسلوقة فهي من الوجبات الخفيفة قليلة السعرات الحرارية ولا تسبب العطش في رمضان.

الطيور
_
للسلق تحفظ نية وتطهى وقت الحاجة مبتاخدش وقت لان طعمها بيغير لما تتشال مستوية 
_
الشيش طاووك شيليه وتبليه واحفظيه جاهز على الشوى وممكن تشيليه متشيش فى العيدان الخشب بعدد افراد الاسرة 
_
الكوردون بلو لوهتعمليه برضه يبقى جاهز بالبيض والبقسماط على التحمير ومتقسم حسب عدد افراد الاسرة وانا باحب ادخله الفرن شوية بعد التحمير عشان اضمن سواه 
_
لو هتعملى مرة وجبة حمام او سمان ممكن تجهزيه وتحشيه فريك وتسلقيه ويبقى جاهز على التحمير لكن الارز مبينفعش الا لما تزودى له البصل وميقعدش كتير يعنى اعملى حسابك تاكليه فى الايام الاولى 




الخضار
_
طبعا بناء على جدولك الخاص هتجهزى اكياس من الخضار سواء بسلة فاصوليا سبانخ قلقاس ولوازمه وخلافه من اللى انت واسرتك بتحبيه ويبقى متخزن فى الفريزر على الطهى وكمان تفرزى كرنب وورق عنب حسب احتياجاتك 
_ -
تفريز الاعشاب ذي البقدونس والكزبره والنعناع والكرفس لانهم بيأخدوا وقت ف التنظيف والفرم يبقوا جاهزين على الاستخدام بتتعمل مكعبات او تتقطع صغيرا وفى اكياس




الفلفل الالوان 
قطعى الفلفل الالوان شرائح رفيعة "جوليان" واحفظى كل لون فى كيس وقت الاستخدام تاخدى منه الكمية اللى انت محتاجاها على النار على طول ... واحتفظى باكياس اخرى مقطعة مكعبات 





البقول
_
اسلقى فاصوليا بيضاء وقسميها فى اكياس للطبخ او السلاطة وزيها اللوبيا والفاصوليا الحمراء
_
اسلقى حمص وقسميه فى اكياس صغيرة للسلاطة وفتة الشاورما والكشرى 




صوانى 
ممكن تجهزى الصوانى دى على دخول الفرن لو عندك مكان ” ديب فريزر
الجلاش والرقاق والمسقعة والمكرونة البشاميل بالسبانخ او بالعصاج




اشياء مساعدة
_
جهزى كمية من مرقة الدجاج البيتى هتنفعك فى الشوربة اليومية لو مخزنتيش شوربة كفاية 
_
جهزى تتبيلة السمك فى برطمان بالتلاجة تسحبى منه على طول 
_
لو الرز اللى بتشتريه بيتنقى نقى كمية تكفى الشهر 
_
اطحنى نصف كيلو سكر للحلويات وكعك العيد
_
لو بتحبى المخللات فى رمضان "انا لا افضلها" جهزى الانواع اللى بتحبيها قبله بشهر مثلا حاجة حاجة على مهلك
_
لو بتحبى البيتزا فى رمضان جهزى العجينة وقسميها وفرزيها وكمان جهزى الصوص واحفظيه فى التلاجة 

_
عمل ثوم مفروم و تجميده مفروم فى علبه محكمة  الاغلاق او كيس بلاستيك مبطط ومتقسم مكعبات صغيرة بظهر السكين او بمسطرة للاستخدام السريع ... و شوية ثوم مفصص بدون فرم لوحدهم 
_
عمل عصير كميه من الطماطم المعصوره و تعبئتها فى أكياس فى الفريزر و إذا لم تتمكنى من ذلك ممكن تجميد الطماطم كما هى و عند تسييحها حتلاقى قشرتها إنفصلت عنها ...إنزعيها و إضربيها فى الخلاط بتبقى كأنها طازجه بالظبط 



ترتيب الفريزر
_
قومي بتقسيم اللحوم إلى كميات صغيرة وإعادة تغليفها بإحكام وتجميع اللحوم المغلفة من نفس النوع ووضعها داخل كيس تفريز كبير الحجم مكتوب عليه الصنف 

_
اتبعى نفس الطريقة بالنسبة لكل ماتفرزين بحيث يسهل عليكى الوصول للصنف المطلوب بسرعة
_
إحرصي على عدم تكديس الأطعمة فوق بعضها وضعيها بطبقات فردية لتضمني توزيع الهواء البارد بصورة متساوية 
_
قسمى الفريزر رف للطعام النئ من لحوم وفراخ .. ورف للخضروات والاطعمة شبه الناضجة مثل الصلصات والسمبوسك والمحاشى ومثيلاتها .. ولو متوفر ديب فريزر يبقى درج للفراخ وواحد للحم وواحد للخضروات وواحد للاطعمة شبه المعدة وهكذا 
السحور 
_
طبعا مش هننسى ندمس كيلو والا اتنين فول حسب استهلاكنا الطبيعى فى الشهر ونقسمه فى اكياس على قد الوجبة




الحلويات
_
القطايف " وطبعا ممكن تعمليها فى البيت " احشيها وفرزيها فى اكياس صغيرة على قد استعمال اليوم اول بأول كل فرد قطعتين مش عايزين جسمنا يتقل ووزننا يزيد .. الصيام فرصة جيدة لضبط الوزن
_
العسل "السيرب" جهزيه على الاستخدام فى برطمانات زجاجية فى
دولاب المطبخ
_
البلح فصصيه وشيلى النوى وشيليه فى شنطة بلاستيك بدرج التلاجة
_
المشمشية قطعيها وشيليها فى برطمان زجاج برف التلاجة ونفس الشئ بالنسبة للتين والقراصيا لو كنتى بتستخدميهم للخشاف
_
جهزى خلطة حشو الحلويات من سودانى مجروش "مش هنجيب مكسرات" وجوز هند وزبيب ومعلقة سكر واحفظيها فى علبة اوبرطمان زجاج فى رف التلاجة
_
جهزى اصابع جلاش محشية بالخلطة السابقة فى اطباق فوم جاهزة على التحمير وطبعا عندك العسل جاهز
_
الكنافة قطعيها وحمريها فى السمن وقسميها فى اكياس ومتكتريش يعنى حطى فى الكيس مقدار يعمل قطعة لكل فرد فى الاسرة واعملى صابح بصابح افضل وممكن تعمليها على البوتاجاز من فوق فى صينية صغيرة وتقلبيها


العصائر
لوعندك مكان ابدئى جهزى اكياس صغيرة من فاكهة الموسم لضربها فى الخلاط وعمل عصير سريع
برتقال .. فراولة .. جوافة .. الى اخره من الفواكه المتاحة حتى رمضان


وفي الاخير نتمنى ان يلقى الموضوع اعجابكم وتتم مشاركته لتعم الفائدة على الجميع 
تقبل الله منا ومنكم الصيام والقيام








ليست هناك تعليقات:

إرسال تعليق