اخر الاخبار

الثلاثاء، 30 يوليو 2019

فتة الشيش طاووق و التوميه السوري

فتة الشيش طاووق و التوميه السوري



طعمها تحفه تحفه بجد و أحلى من كل المطاعم السوري كمان

تتبيلة الشيش طاووق :
كيلو صدور متقطعه مكعبات
علبة زبادي
معلقه كبيره مسترده
معلقتين صويا صوص 
معلقه صغيره ملح
نص معلقه صغيره فلفل اسود
معلقه صغيره توم بودر
معلقه صغيره بصل بودر
ربع معلقه صغيره حبهان بودر
ربع معلقه صغيره سماق
عصير ليمونه

الطريقه :
هنقلب التتبيله و نتبل مكعبات الفراخ و نغطيها و نسيبها ليله كامله .

التسويه :
في طاسه سخنه على النار هنحط معلقتين زيت و نصفي الشيش طاووق من التتبيله و ننزله في الطاسه و نقلبه لما يبدأ ياخد لون و بعدين نسيبه لحد ما يستوي و في الآخر نولع فحمه و نطفيها معاه و نغطي كويس عشان ياخد الريحه .
أو نحطه في صنيه و نغطيها بالفويل و ندخله فرن سخن لحد ما يستوي و بعدين نشيل الفويل و نولع الشوايه يتحمر و نطفي معاه فحمه .
الطريقتين كويسين جدا في التسويه انا هنا عملته في الطاسه .

الرز البسمتي :
كوب رز مغسول و متصفي
بصله صغيره مفرومه
فلفل أخضر متقطع
٣ فصوص حبهان
عود قرفه خشب
نص معلقه صغيره كاري
ربع معلقه بودرة زعفران
مكعب مرقه
زيت
شوربه أو ميه للتسويه

الطريقه :
في حله على النار هنحط الزيت و ننزل البصل و نقلبه لحد ما لونه يتغير و ننزل عليه الفلفل الأخضر و الحبهان و القرفه و مكعب المرقه و بودره الزعفران و الكاري و نقلب و نضيف الرز و نحمصه شويه مع البهارات و بعدين ننزل الشوربه أو الميه و نسيبه يغلي و بعدين نوطي النار و نسيبه يكمل تسويه .

التوميه :
كوب ميه
معلقتين كبار نشا
فصين توم
نص ليمونه
نص علبة زبادي
نص معلقه صغيره ملح
ربع كوب زيت

الطريقه :
هنقلب الميه مع النشا على البارد لحد ما تدوب و بعدين نحطه على النار مع التقليب لحد ما يتقل و يبقى لونه شفاف و نطفي و نسيبه يبرد .
بعد ما يبرد هنحطه في الخلاط أو الكبه و نضيف عليه التوم و الليمون و الملح و الزبادي و نضرب كويس و ننزل الزيت تدريجي لحد ما القوام ينعم و يتقل و بعدين ندخله التلاجه يبرد و يتقل أكتر .

العيش :
عيش لبناني متقطع مربعات بالمقص أو بالسكينه و نحمره في زيت غزير سخن و نطلعه على مناديل مطبخ أو ندهنه زيت خفيف و ندخله تحت الشوايه يتحمر .

ترتيب الطبق :
أول حاجه هنوزع العيش المحمص في الارضيه و الأطراف و بعدين نحط فوقه الرز و نرص عليه قطع الفراخ و نزين بالتوميه و رشه من الخضره و بالهنا


ليست هناك تعليقات:

إرسال تعليق