حلى الطبقات

حلى الطبقات

حلى الطبقات عبارة عن نوع حلويات متكون من طبقات تنقسم الى : 

الطبقه الأولى كيك شوكولاته مسقي بالكاكاو
الطبقه التانيه كريمه
الطبقه التالته بسكوت مفتت
التزيين شوكولاته دارك و أبيض

مكونات الكيك :
نص كوب زيت
نص كوب لبن أو ميه
كوب سكر
كوب و ربع دقيق منخول
ربع كوب كاكاو خام منخول
٢ بيضه
فانيليا
معلقه كبيره ممسوحه بيكنج بودر

الطريقه :
هنضرب الزيت و السكر في الخلاط و نضيف البيض و الفانيليا و نكمل ضرب و بعدين اللبن أو الميه و نضرب و نقلب المكونات الجافه الدقيق و الكاكاو و البيكنج بودر و ننزل عليه الخليط السايل و نقلب بسباتيولا لحد ما المكونات تندمج.
هنجيب بايركس و ندهنه بالسمنه و ننزل فيه خليط الكيك.

التسويه :
هندخل الكيك فرن سخن على درجة حراره ١٨٠ لمده نص ساعه و نختبرها .
بعد ما تخرج من الفرن هنسيبها تهدى عشر دقايق و نسقيها بكوب كاكاو ( كوب لبن و معلقة سكر و معلقة كاكاو )

طبقة الكريمه :
٢ كوب لبن
٢ باكيت كريم كراميل
باكيت بسكوت ساده مطحون
علبة قشطه بوك أو نستله
٣ مربعات جبنه كيري
معلقة صغيرة كاكاو خام

الطريقه :
في حله على النار هنحط اللبن و الكريم كراميل البودره و الكراميل اللي معاه و نقلب لحد ما يتقل و نطفي و نسيبه يبرد و نضربه في الخلاط مع باقي المكونات البسكوت و القشطه و الكيري و الكاكاو لحد ما المكونات تندمج و نفرد الخليط على الكيك .
هنطحن باكيت بسكوت ساده و نغطي بيه الوش و بعدين نسيح شوكولاته دارك و شوكولاته بيضا و نزين بيها و ندخلها الثلاجه تبرد و بالهنا

للامانة الوصفة منقولة